إنتصار : ميهمنيش أظهر بشكل حلو فى أعمالى .. المهم أقدم الدور صح

تحدثت الفنانة إنتصار، عن مشاركتها في مسلسل "فخر الدلتا" المقرر عرضه في رمضان 2026 على قنوات الشركة المتحدة للخدمات الإعلامية، وتجربة التعاون في عمل من بطولة فنان صاعد، وهو الممثل وصانع المحتوى أحمد رمزي والذي يقدم أول بطولة مطلقة له، بجانب حديثها عن مشاركتها في مسلسل" علي كلاي" بطولة الفنان أحمد العوضي.

وقالت إنتصار في مداخلة هاتفية ببرنامج "كلمة أخيرة"
“لما الشركة قالت لي في حد جديد عاوزين نلتف حول التجربة ونطلعها إيه رأيك تقفي جنب المسلسل، قلت لهم طبعا يالا بينا الدور حلو وجميل، وسألوني عندك مشاكل تشتغلي مع حد جديد لأنك بتشتغلي في مسلسلات كبيرة مع نجوم كبار قلت لهم لا خالص أهم حاجة يبقى الدور كويس مع جديد أو قديم، مين بدأ كبير كلنا بدأنا صغيرين وبدأنا بتجربة مشهد أو اتنين أو تلاتة، وفيه ناس وقفت جنبا، وإحنا واجبنا نقف مع اللي بعدنا”.

وعن موهبة أحمد رمزي قالت: “بيتحلى بخفة الظل وعنده سرعة بديهة ودي من صفات الكوميديان وبالنسبة للشغل مجتهد ومركز ودي حاجة مهمة”.

أما عن التعاون مع الفنان أحمد العوضي في مسلسل علي كلاي المقرر عرضه في رمضان قالت: "الحلقة مش هتكفي لو اتكلمت عنه هو مثال للإنسان.. هو إنسان وجدع وعنده رجولة وابن بلد وطيب ويسمع ويحتوي الناس اللي حواليه ودي صفات جميلة فيه كإنسان".

حول دورها في مسلسل علي كلاي قالت: "بقدم حاجة جديدة والعمل جديد وفيه صراعات أسرية بتدل على الطمع الإنساني داخل العيلة".

بالنسبة إلى خوفها من المقارنة بين أدائها العام الماضي بمشاركتها في إش إش و80 باكو، قالت: “الناس بتكون مبسوطة وبيقولولي عاوزين حاجة زي إش إش”، مشيرة إلى أنها تشارك في رمضان بـ 4 مسلسلات.

أما عن تقديمها لمعظم أدوارها دون مكياج وبشكل طبيعي، كما في مسلسلي" 80 باكو" و"إش إش" ، فقالت:"من البداية ما كانش شاغلني أبدًا إني أظهر حلوة، أنا بركز في الدور محتاج إيه، اللي بعمله هو الصح، لأن الغلط إن الممثل يقدم الشخصية بفول ميكب لو الدور مش طالب كده، المفروض يقدم الدور زي ما هو".