نرمين الفقي..تعرضت لخيانات كثيرةورفضت أكون زوجة تانية

كشفت الفنانة نرمين الفقي أنها لا تقبل أن تكون زوجة ثانية على الإطلاق، كما كشفت سبب عدم زواجها حتى الآن ومواصفات الشخص الذي تتمناه.

وقالت نرمين الفقي خلال استضافتها في برنامج كلمة أخيرة على قناة ON: “لو متجوزة أرفض أن زوجي يتجوز عليا، لأني في حياتي لما كنت برفض أي عريس متجوز، كنت بقول إني مش هخرب بيت واحدة ومش هحط نفسي في الموقف ده فالبالتي مش هقبل ده على نفسي”.

وعن سبب عدم زواجها حتى الآن قالت: “قسمة ونصيب وفي حاجات كتير في الحياة ممكن الواحد يقع فيها.. ممكن يجلي راجل مرتبط أو متجوز وبرفض تمامًا لأني مش خرابة بيوت وممكن البيت نفسه يكون فيه مشاكل لكن أنا عقلي الباطن هيخليني أحس أن فيه ست ممكن تتوجع أو تتألم بسببي. وممكن راجل يتقدم لي وهو منفصل وأنا معرفش انه منفصل، فممكن أبعد عنه وأنا معرفش أنه منفصل”.

وأضافت عن مواصفات الشخص الذي تتمناه: “أنا محتاجة راجل بمعنى الكلمة يعني أخلع رداء الرجولة اللي أنا بحاول أبينه قدام الناس ولا ابقى سوى أني أكون امرأة، مش راجل غير حقيقي مش هو اللي اعتمد عليه، لأن الشخص لما يقعد فترة كبيرة من غير جواز بيكون معتمد على نفسه في حاجات كتير”.

وأكملت:"مش معنى كده إني عاوزة راجل ما حصلش مفيش حاجة اسمها كده، ولأني مش ست ماحصلتش، لكن راجل بمعنى الكلمة يتحمل المسؤولية فالموضوع مش سهل".

في سياق آخر، أكدت نرمين الفقي أنها لا تحب الانتقام، عكس شخصية فايقة في مسلسل أولاد الراعي، قائلة: “لو مكان فايفة مش هنتقم أنا مش بتاعة انتقام ولما حد بيضايني بنسحب من سكات لأني مش من الناس اللي بتتخانق”.

وعما إذا كانت تعرضت لخيانات من قبل: “أكيد مش شرط الخيانة تكون من راجل، ممكن من ست، وبتقابل خيانات كتير بداية من الناس اللي بتشتغل معاك، وأنا في المواقف دي بنسحب تمامًا”.

وأشادت نرمين الفقي بسيناريو العمل، وتفاصيل شخصيتها، مشيرة إلى أن شخصية فايقة رغم شرها إلا أن كان لديها دافع كبير، موضحة: “فايقة كان عندها دافع حتى لو إحنا مش راضيين عنه وهي عملت كده وعندها أسبابها، والأم الطبيعية بتكون شرسة لو حد جه على عيالها”.